ఏమని చెప్పఁగవచ్చు (Emani Cheppagavachu)

కృతికర్త : శ్రీతాళ్లపాక అన్నమాచార్య 

రాగం : భైరవి 

పల్లవి: 

ఏమని చెప్పఁగవచ్చు నిదివో నీ ప్రతాపము

రామ రామభద్ర సీతారమణ సర్వేశ

చరణం 1: 

వెరవున హరువిల్లు విరుఁగఁ దీసిననాఁడే

అరయ విరిగె వీపు లసురలకు

వరుస వనవాసపువ్రతము వట్టినపుడె

పరులమతుల భీతి వట్టె రఘురామ॥ఏమ॥

చరణం 2: 

వచ్చి నీవు దండకావనము చొచ్చిననాఁడే

చొచ్చిరి పాతాళ మసురలెల్లాను

ముచ్చటాడి చుప్పనాతిముక్కు గోసిననాఁడే

కొచ్చి దైత్యు లాసదెగఁ గోసిరి శ్రీరామ॥ఏమ॥

చరణం 3: 

అడరి మారీచుపై నమ్ము విడిచిననాఁడే

విడిచిరి దానవులు వేడుకలెల్లాను

బడి విభీషణునిఁ జేపట్టితే రక్కసులెల్లా

చిడిసి మల్లెవట్టిరి శ్రీవేంకటరామ॥ఏమ॥