రచన: జయదేవ మహాకవి
రాగం: మాళవగౌడ
తాళం: ఏకతాళీ
భాష : సంస్కృతం
సఖి! హే కేశిమథన ముదారం
రమయ మయా సహ మదన మనోరథ భావితయా స వికారమ్‌ ॥
నిభృత నికుంజ గృహం గతయా నిశి రహసి నిలీయ వసంతం ।
చకిత విలోకిత సకల దిశా రతి రభస భరేణ హసంతమ్‌ ॥
ప్రథమ సమాగమ లజ్జితయా పటు చాటు శతైరనుకూలం ।
మృదు మధుర స్మిత భాషితయా శిథిలీకృత జఘన దుకూలమ్‌ ॥
కిసలయ శయన నివేశితయా చిరమురసి మమైవ శయానం ।
కృత పరిరంభణ చుంబనయా పరిరభ్య కృతాధర పానమ్ ॥
అలస నిమీలిత లోచనయా పులకావలి లలిత కపోలం ।
శ్రమ జల సకల కళేబరయా వర మదన మదాదతిలోలమ్‌ ॥
కోకిల కలరవ కూజితయా జిత మనసిజ తంత్ర విచారం ।
శ్లథ కుసుమాకుల కుంతలయా నఖ లిఖిత ఘన స్తన భారమ్‌ ॥
చరణ రణిత మణి నూపురయా పరిపూరిత సురత వితానం ।
ముఖర విశృంఖల మేఖలయా సకచ గ్రహ చుంబన దానమ్‌ ॥
రతి సుఖ సమయ రసాలసయాదర ముకుళిత నయన సరోజం ।
నిస్సహ నిపతిత తనులతయా మధుసూదన ముదిత మనోజమ్‌ ॥
శ్రీ జయదేవ భణిత మిదమతిశయ మధు రిపు నిధువన శీలం ।
సుఖముత్కంఠిత గోప వధూ కథితం వితనోతు సలీలం ॥
Audio Link - Click Here
Comments
Post a Comment